>

Aglonéma Diprédiksi Tetep Bakal Jadi Primadona

  Kamis, 06 Mei 2021   Redaksi AyoBandung.Com
Agloneman. (Republika.co.id)

BANDUNG, AYOPURWAKARTA.COM -- Sanajan loba kekembangan anyar maruncul, aglonéma diprédiksi tetep bakal jadi primadona trénd kekembangan taun 2021. Éta, ceuk Denda, nu boga usaha kios di Jalan Soekarno Hatta, Bandung, ka Ayobandung.com, sababaraha waktu nu can lila.

Kunaon kitu? Sabab, aglonéma nu boga ngaran latin Chinese evergreen ieu boga kakhasan nu teu parok jeung batur. Daunna laléncop. Warnana rupa-rupa: beureum, héjo, beureum kahéjo-héjoan, aya konéngan. Urat-uratna kaluar teges. Éndah wé.

Aya dua tipe aglonéma: aglonéma lokal jeung aglonéma ras (hasil impor). Aglonéma lokal turunanna: keladi, bahagia, jeung beureum. Sedengkeun aglonéma impor turunanna black lipstick, emerald, jeung sweet dream.

Cara ngabédakeun lokal atawa imporna bisa tina warna daun. Ogé tina cara “berkembangbiakna” gé béda. Aglonéma lokal mah gampang “berkembang biak” jeung ngagedéanna, sedengkeun aglonéma impor mah rada kedul ngagedéanna.

Unikna aglonéma moal aya kembangan. Lamun daunna ruksak, atawa konéng, potong wé méh teu ngahalangan ka kasuburan daunna nu lain.

Ngurusna gampang. Teu ribet. Béré pot kembang nu bisa nyimpeun cai. Simpeun di tempat nu kacaangan panon poé, tapi tong lila teuing, maksimal 6 jam lah. Cara nyéborna bisa disemprot atawa dibanjur. Tingali wé mun taneuh dina potna garing, nya gancang cébor.

Cukup sapoé sakali atawa dua poé sakali. Gumantung keur musim naon. Aglonéma bisa disimpeun di jero ruangan jeung di luar ruangan.

“Rusakna aglonéma biasana lantaran remen dipindah-pindah atawa diangkat-angkat. Bisa ogé lantara ku hama, atawa loba teuing kacaangan panonpoé ,” ceuk Denda.

Harega aglonéma lokal dibanderol ti mimiti Rp10.000 nepi ka Rp50.000. Sedengken aglonéema impor ti mimiti  Rp100.000 nepi ka Rp1.000.000. Harga sakitu téh bisa robah lamun keur booming di pasaran.

“Aglonema impor nuju kosong. Lamun aya agé, moal dipajang sok diinceur ku maling,” ceuk Denda. (Ghina Tsuroya)

   Ayo Bagikan!
Ayo Respon
   Komentar

Komentar sepenuhnya menjadi tanggung jawab pribadi seperti diatur dalam UU ITE

Komentar